Jedyn hawiyrz mioł strasznie wraźnóm babe. Roz ta baba prawiła chłopu, że sie musi przejechać w szoli.
A hawiyrz ji prawi:
- Ja, babo, na szachte cie nie puszczóm. Ale w szoli sie możesz przejechać.
- Tóż jakóż sie mogym przejechać w szoli, jak mie na szachte nie puszczóm? - pyto sie baba.
A chłop ji na to:
- Przejedziesz sie w szoli tuki w chałupie!
Potym w stodole po samóm kalynicóm przibił zieleźnóm rolke, przez nióm przecióngnół porwóz, na jednym jego kóńcu prziwiónzoł ograbczok, potym chycił za drugi kóniec tego porwoza i prawi babie:
- Siodej, staro!
- Do tego kosza?
- Nó toć! Przejedziesz sie jak w szoli, a aspóń sie nie zabijesz.
Baba se dała powiedzieć i wlazła do kosza.
- Tóż jedź, chłopeczku, jyny opaternie! - prawi baba.
I chłop zaczón babe fiedrować pod kalynice. Potym jóm spuścił na gumno. I tak przewióz babe pore razy do wyrchu i na dół.
Babie sie to zapodobało. Prawi chłopu:
- To ci je strasznie dobrze, chłopeczku!
Na to jyny chłop czakoł. jak baba była pod samóm kalynicóm, chłop puścił porwóz i powiedzioł:
- Staro nikiedy sie też szol w hawiyrni urwie!
Baba strzaskała zadek, i już wiyncej nie chciała słyszeć o hawiyrni.
Opowiedział Karol Ondrusz z Darkowa.
